“La lenghe furlane e je nudriment pal cerviel. Sielç il furlan, sielzilu ancje a scuele”. Al è il sproc de impuartante campagne regjonâl di sensibilizazion “Pavee. La magjie dal furlan”, promovude de ARLeF (Agjenzie Regjonâl pe Lenghe Furlane), che si inviarà, intai dîs che a vegnin, sui social, par dopo slargjâsi aes salis cinematografichis des provinciis di Udin, Pordenon e Gurize, cu la proiezion di un spot dedicât (de durade di 30 seconts), cuntun lengaç cetant emozionâl. Inte campagne, a saran cjapadis dentri ancje lis televisions locâls e la cjarte stampade (setemanâi e cuotidians). Cun di plui, intal periodi prime des iscrizions scolastichis (metât dicembar/zenâr) al vignarà distribuît a dutis lis fameis dal teritori furlanofon un depliant cun informazions e indicazions pratichis su la opzion dal furlan tant che materie curicolâr.
«La gnove campagne promozionâl de ARLeF – al sclarìs il president Lorenzo Fabbro – e je stade ideade tant che continuazion e disvilup dal progjet “Cressi cun plui lenghis” par promovi il plurilinguisim in etât precoce e par contâ la lenghe furlane tant che element di ricjece, di scuvierte e di vite. Il target de campagne al è rapresentât di gjenitôrs cun fruts in etât prescolâr e scolâr che si cjatin devant de sielte de lenghe o des lenghis di insegnâ in maniere direte ai propris fîs, o di avalêsi di chês intal percors scolastic. Ducj i specialiscj a concuardin sul fat che i fruts bilengâi – al conclût Fabbro – a imparin cun plui facilitât altris lenghis, tant che chê inglese, a àn une plui grande cussience e tolerance viers lis diversitâts, e si costruissin un futûr plen di relazions e di oportunitâts professionâls. Inte nestre regjon, la oportunitât di cressi bilengâi si pues cjapâ sù cun facilitât e in maniere spontanie».
L’insegnament de lenghe furlane a scuele al è previodût des normativis statâls e regjonâls e si inserìs intal 20 par cent de cuote di autonomie locâl che la scuele e à intal curriculum complessîf, definide su la base des esigjencis dal contest sociâl e culturâl di riferiment. Al moment de iscrizion, al prin an di ogni cicli scolastic, i gjenitôrs a segnin sul model di iscrizion, prontât di pueste de scuele, se pai propris fîs a vuelin avalêsi dal insegnament de lenghe furlane. La opzion esprimude al moment de iscrizion e reste buine dulinvie dal cicli. Il Regolament pal insegnament de lenghe furlane al previôt la introduzion di modui di almancul 30 oris par grup-classe o par sezion, tignûts di insegnants dal ples o di esternis. Par ducj i aprofondiments dal câs, si pues visitâ il sît de ARLeF ae sezion “Cressi cun plui lenghis”.